Բիզնես Լիգա մրցաշարի նպատակը Հայաստանում ֆուտզալը զարգացնելն է

Բիզնես Լիգա մրցաշարի նպատակը Հայաստանում ֆուտզալը զարգացնելն է


Մարտի 12-ից Երեւանում կմեկնարկի Ֆուտզալ Բիզնես Լիգա սիրողական մրցաշարը:

 

Կազմակերպիչներն այսօր հանդիպել են լրագրողների ու հայտեր ներկայացրած ընկերությունների անդամների հետ ու պատմել այսպիսի Լիգա ունենալու նպատակի մասին:

Մրցաշարը կազմված է լինելու A եւ B լիգաներից: Այս պահի դրությամբ արդեն ավելի քան 20 ընկերություն ելույթ ունենալու ցանկություն է հայտնել: Դրանց թվում են Հայաստանի լրագրողների հավաքականը, ԱԺ պատգամավորներից կազմված թիմը, «Յուքոմ», «Գրանդ Քենդի», «Քարֆուր», «Կոկա-Կոլա» ընկերությունները, ՎՏԲ, «ԱԿԲԱ-Կրեդիտ Ագրիկոլ» բանկերը:

«Ֆուտզալ Բիզնես Լիգա» ՀԿ-ի նախագահ Ռուբեն Նազարեթյան

Մրցաշարի նպատակը ֆուտզալ մարզաձեւը մեր երկրում մասսայականացնելն ու զարգացնելն է: Կարծում եմ, որ այստեղ կլինեն մասնակիցներ, ովքեր հետագայում կկարողանան համալրել տարբեր տարիքային հավաքականների շարքերը: Բիզնես Լիգան գործելու է նաեւ մարզերում եւ Արցախում:

Ցանկանում ենք, որ այս մրցաշարի միջոցով ուժեղանա Բարձրագույն խումբը: Այն ակումբները, ովքեր կաճեն ու կտեսնենք, որ կարող են հանդես գալ Բարձրագույն խմբում՝ կուղորդենք այնտեղ: Չի բացառվում, որ լինի նաեւ հակառակը. այսինքն, Բարձրագույն խմբի այն թիմերը, որոնք մակարդակով շատ ցածր են ու խոշոր հաշիվներով պարտություններ են կրում, կտեղափոխվեն Բիզնես Լիգա:

Ստեղծելու ենք Բիզնես Լիգայի հավաքական, որը կխաղա միջազգային սիրողական մրցաշարերում, մեր հավաքականի հետ: Արդեն ունենք հրավեր Վրաստանից, առաջնության ավարտից հետո կորոշենք մասնակցության հարցը:

Նշեմ, որ ակումբները պետք է ներկայացնեն հավաստագրեր, ֆուտբոլիստները պետք է լինեն գրանցված:Մրցավարները ներկայացնելու են ՀՖՖ-ն, որը համագործակցում է մեզ հետ:

ՀՖՖ Ֆուտզալի եւ Կանանց ֆուտբոլի բաժանմունքի պետ Խորեն Զարգարյան

ՀՖՖ-ի հետ համագործակցության պայմանագիր է ստորագրվելու, որը լինելու է մրցաշարի աջակիցը: Մենք նույն բանն ենք ցանկանում՝ զարգացնել ֆուտզալը Հայաստանում, որպեսզի ամեն ինչ համակարգված լինի: Պետք է նկատել, որ Բիզնես Լիգան ՀՖՖ-ի կազմակերպած միջոցառումը չէ եւ նրա հովանու ներքո չի անցկացվում, մենք պարզապես համագորակցում ենք: Ես, որպես ՀՖՖ ֆուտզալի եւ Կանանց ֆուտբոլի բաժանմունքի պետ, իմ խորհուրդներով կփորձեմ օգնել մրցաշարի պատշաճ անցկացմանը:

Կազմակերպիչ Արամ Մելիքյան

Երկար տարիներ ես կազմակերպել եմ SS Cup ֆուտզալի սիրողական մրցաշարը, որն այսուհետ չի գործելու, քանի որ միացել ենք Բիզնես Լիգային ու ցանկանում ենք միասին աշխատել: Նախատեսվում է, որ եւս 10-12 թիմեր կմիանան մեզ, որոնք արդեն կսկսեն խաղալ ապրիլին մեկնարկող մրցաշարում:

Նշենք, որ Բիզնես Լիգայի խաղերը կայանալու են «Դինամո» մարզադահլիճում, լինելու է ինտերնետային հեռարձակում, իսկ մրցաշարի մասին ցանկացած նորություն տեղադրվելու է fbl.am պաշտոնական կայքում:

17-02-2016 13:42:40
Վերադառնալ